ភាពជោគជ័យនៃ អតីតសិស្ស វឌ្ឍនៈ ភិគុណកែវ
ជម្រាបសួរ លោកអ្នកអាណាព្យាបាល លោកគ្រូ អ្នកគ្រូ បងៗ និង ប្អូនៗសិស្សានុសិស្សទាំងអស់គ្នា។ នាងខ្ញុំមានឈ្មោះ វឌ្ឍនៈ ភិគុណកែវ ជាអតីតសិស្សនៃសាលារៀន អន្តរទ្វីប អាមេរិកាំង សាខាផ្សារថ្មី នាឆ្នាំសិក្សា ២០២០-២០២២។ នាងខ្ញុំបានបញ្ចប់ថ្នាក់វិទ្យាល័យ ក្នុងការប្រឡងសញ្ញាបត្រមធ្យមសិក្សាទុតិយភូមិកាលពីឆ្នាំ ២០២១។
បទពិសោធនៃការសិក្សារបស់ខ្ញុំ គឺផ្ដោតសំខាន់ទៅលើការសិក្សាទាំងក្នុងសាលារៀនជាក់ស្ដែង ការសិក្សាក្នុងថ្នាក់ និងការសិក្សាក្រៅសាលារៀន គឺការសិក្សាបន្ថែមនៅពេលវេលាទំនេរបន្ទាប់ពីសិក្សាក្នុងថ្នាក់រួចរាល់។
១. ការសិក្សាក្នុងថ្នាក់ជាគន្លឹះសំខាន់សម្រាប់សិស្សគ្រប់រូបក្នុងការទទួលបានចំណេះដឹង ពីការបង្រៀនយ៉ាងល្អិតល្អន់ពីសំណាក់លោកគ្រូ អ្នកគ្រូ។ វាជាពេលវេលាដែលទាមទារឱ្យសិស្សានុសិស្សគ្រប់រូបត្រូវព្យាយាមត្រង់ត្រាប់ស្ដាប់ កត់ចំណាំនូវរាល់ចំណុចសំខាន់ពីការពន្យល់របស់លោកគ្រូ អ្នកគ្រូ។ សាលារៀន អន្តរទ្វីប អាមេរិកាំង តែងលើកទឹកចិត្តឱ្យសិស្សានុសិស្សគ្រប់រូប ចោទសួរនូវរាល់ចម្ងល់ដែលកើតមានឡើង គួបផ្សំនឹងការរីករាយនូវការឆ្លើយសំណួររបស់សិស្សគ្រប់រូប។ លោកគ្រូ អ្នកគ្រូតែងចាំជួយអ្នកទាំងអស់គ្នាជានិច្ច។ ដូច្នេះហើយ នេះជាគន្លឹះដ៏សំខាន់ដែលប្អូនៗសិស្សានុសិស្សត្រូវតែប្រកាន់ខ្ជាប់ជានិច្ច។
២. ក្រៅពីការសិក្សាក្នុងថ្នាក់ ការសិក្សាបន្ថែមក៏ជាកត្តាក្នុងការជួយជុំរុញចំណេះដឹងរបស់សិស្សានុ សិស្សគ្រប់រូបផងដែររួមមាន ការស្វ័យសិក្សាដោយខ្លួនឯង និងការសិក្សាជាមួយមិត្តរួមថ្នាក់ អាស្រ័យទៅលើចំណង់ចំណូលចិត្តរបស់សិស្សម្នាក់ៗ ប៉ុន្តែគន្លឹះទាំងពីរនេះពិតជាមានសារៈសំខាន់ស្មើៗគ្នា។
