ភាពជោគជ័យនៃ អតីតសិស្ស ហ៊ួរ ស៊ីវឡាង

ជម្រាបសួរបងប្អូនជាទីគោរព និងជាទីស្រឡាញ់ទាំងអស់គ្នា នាងខ្ញុំឈ្មោះ ហ៊ួរ ស៊ីវឡាង គឺជាអតីតសិស្សនៃសាលារៀន អន្តរទ្វីប អាមេរិកាំង សាខាចោមចៅ ដែលបានបញ្ចប់ការសិក្សាក្នុងឆ្នាំ ២០២២។ សព្វថ្ងៃនេះនាងខ្ញុំគឺជានិស្សិតឆ្នាំទី២ ដែលបានបន្តការសិក្សានៅវិទ្យាស្ថាន ខេមអេដ (CamEd Business School) ផ្នែក គណនេយ្យ និងហិរញ្ញវត្ថុ។
    ចំពោះបទពិសោធនៃការសិក្សា នាងខ្ញុំគឺតែងតែឱ្យតម្លៃទៅលើចំណេះវិជ្ជាជាចម្បង ពីព្រោះចំណេះវិជ្ជាគឺជាស្ពានដែលជួយចម្លង ព្រមទាំងជួយឱ្យជីវិតរបស់យើងនាពេលអនាគតបានដូចជាភ្លើងទៀនដែលជួយបំភ្លឺផ្លូវមានភាពត្រចះត្រចង់ផងដែរ។ ក៏ព្រោះតែការឱ្យតម្លៃទៅលើការសិក្សា និងចំណេះវិជ្ជាបែបនេះហើយទើបធ្វើឱ្យការសិក្សារបស់នាងខ្ញុំអាចទទួលភាពជោគជ័យទៅបាន។ បន្ថែមពីលើនេះ ភាពជោគជ័យនៃការសិក្សារបស់នាងខ្ញុំ គឺបានកើតចេញពីកត្តា៣សំខាន់ៗមានដូចជា កត្តាខ្លួនឯង កត្តាគ្រួសារ និងការជ្រើសរើសសាលារៀនដែលត្រឹមត្រូវ។ 

•  កត្តាទី១ ខ្លួនឯង៖  ការកំណត់គោលដៅ និងភាពមានវិន័យសម្រាប់ខ្លួនឯងគឺជារឿងដែលចាំបាច់សម្រាប់អ្នកសិក្សាគ្រប់រូប។ ពីព្រោះនៅពេលដែលយើងបានកំណត់គោលដៅសម្រាប់ខ្លួនឯង យើងនឹងយល់ពីគោលបំណង និងលទ្ធផលដែលខ្លួនចង់សម្រេចបាន។ ហើយការមានគោលដៅក៏បង្កើនការលើកទឹកចិត្ត និងការប្ដេជ្ញាចិត្តក្នុងការសិក្សាផងដែរ។ នៅពេលដែលយើងមានគោលដៅច្បាស់លាស់នៅក្នុងចិត្ត យើងនឹងរក្សាការខិតខំប្រឹងប្រែង តស៊ូដើម្បីសម្រេចនូវគោលដៅមួយនោះ។ មួយវិញទៀតភាពមានវិន័យ ចំពោះខ្លួនឯង ការគោរពពេលវេលានៃការសិក្សា ការចេះគ្រប់គ្រងអារម្មណ៍ និងសកម្មភាពរបស់ខ្លួនដោយមិនអនុញ្ញាតឱ្យបញ្ហាខាងក្រៅប៉ះពាល់ដល់ការសិក្សារបស់យើង នោះនឹងបង្កើតនូវទម្លាប់ដ៏ល្អមួយសម្រាប់ការសិក្សា ជាមួយគ្នានេះដែរការសិក្សារបស់យើងនឹងកាន់តែប្រសើរ។ ជាឧទាហរណ៍ការសិក្សានៅ សាកលវិទ្យាល័យក្នុងឆ្នាំទី១នាងខ្ញុំទទួលបានលិខិតសរសើរជា Top Scorer នៃមុខវិជ្ជាអង់គ្លេស។ ហើយសមិទ្ធផលនេះអាចទទួលបានគឺកើតចេញពីយើងខ្លួនឯងដោយចេះកំណត់គោលដៅនិងមានវិន័យសម្រាប់ខ្លួន។
•  កត្តាទី២ គ្រួសារ៖ គ្រួសារក៏ជាចំណែកមួយដែលធ្វើឱ្យការសិក្សារបស់នាងខ្ញុំទទួលបានភាពជោគជ័យ

ផងដែរ។ ការជ្រោមជ្រែង ការលះបង់ និងការលើកទឹកចិត្តរបស់ពួកគាត់គឺជាកត្តាជំរុញមួយដែលជួយឱ្យនាងខ្ញុំមានទឹកចិត្តក្នុងការខិតខំរៀនសូត្រ។ ហើយក៏ព្រោះតែការលះបង់នូវធនធាន កម្លាំងកាយនិងកម្លាំងចិត្តរបស់ ឪពុកម្តាយនាងខ្ញុំ ទើបធ្វើឱ្យខ្ញុំមានការតាំងចិត្តជាខ្លាំងថានឹងប្រឹងប្រែងរៀនសូត្រដើម្បីទទួលបានលទ្ធផលល្អជូនទៅពួកគាត់វិញ។ បន្ថែមពីលើនេះពួកគាត់តែងតែផ្ដល់ដំបូន្មាន និងការណែនាំល្អៗដល់នាងខ្ញុំ។ គ្រប់ពេលដែលខ្ញុំជួបបញ្ហាមិនថាជាបញ្ហាទាក់ទងនឹងការសិក្សាឬបញ្ហាអ្វីផ្សេងនោះទេ ពួកគាត់តែងតែជាទីប្រឹក្សាដ៏ល្អដែលចាំផ្តល់យោបល់ គន្លឹះ និងដំណោះស្រាយផ្សេងៗដល់ខ្ញុំជានិច្ច។ ដោយហេតុនេះហើយទើបគ្រួសារគឺជាកត្តាដ៏សំខាន់មួយនៃភាពជោគជ័យនៃការសិក្សារបស់យើង។

• កត្តាទី៣ ការជ្រើសរើសសាលារៀនដែលត្រឹមត្រូវ៖  សាលារៀនគឺជាកត្តាដ៏សំខាន់មួយនៃភាពជោគ

ជ័យក្នុងការសិក្សា។ ការជ្រើសរើសសាលារៀនដែលត្រឹមត្រូវគឺមានសារៈសំខាន់សម្រាប់ការសិក្សាពីព្រោះតែសាលារៀនគឺជាមជ្ឈដ្ឋានដែលផ្តល់ចំណេះដឹង និងការអប់រំដល់យើងគ្រប់គ្នា។ ប្រសិនបើយើងជ្រើសរើសសាលារៀនដែលត្រឹមត្រូវ នោះយើងនឹងទទួលបានអត្ថប្រយោជន៍ជាច្រើនត្រឡប់មកវិញផងដែរ។ ជាក់ស្ដែងដូចជានាងខ្ញុំដែលបានជ្រើសរើសសាលារៀន អន្តរទ្វីប អាមេរិកាំង (AIS) បន្ទាប់ពី នាងខ្ញុំបានផ្ទេរការសិក្សាពីខេត្តមក។ នាងខ្ញុំជ្រើសរើសសាលារៀន AIS ក៏ព្រោះតែជាសាលារៀន មួយដែលមានទាំងគុណភាព ការអប់រំ វិន័យ និងកម្មវិធីសិក្សាដ៏ល្អជាច្រើនដូចជាការប្រឡងប្រកួតប្រជែង ក្លឹបសិក្សា ការផ្លាស់ប្តូរការសិក្សាទៅក្រៅប្រទេស និងការផ្ដល់ជូននូវអាហារូបករណ៍ផ្សេងៗទៀត។ ជាមួយគ្នានេះដែរសាលារៀន AIS បានផ្តល់នូវបទពិសោធន៍ថ្មីៗជាច្រើនដែលនាងខ្ញុំមិនធ្លាប់មានកន្លងមក។ ហើយក៏បានផ្លាស់ប្ដូរនិងអភិវឌ្ឍនាងខ្ញុំឱ្យក្លាយទៅជាមនុស្សម្នាក់ដែលមានភាពក្លាហាន និងចេះទំនាក់ទំនងជាមួយអ្នកដទៃផងដែរ។ ដូច្នេះហើយប្រសិនបើចង់ទទួលបានភាពជោគជ័យក្នុង ការសិក្សាគឺគួរគប្បីជ្រើសរើសសាលារៀនដែលត្រឹមត្រូវមួយ។